Thursday, September 1, 2016

वसंतातली मखमली पालवी

तू वसंतातली मखमली पालवी
गारवा गंध वारा उन्हासारखी
फूल तू पाकळीचा तरल गंधही
तू तृणातील कोमल दवासारखी..

रात्रभर चांदण्याचा जसा तू सडा
पौर्णिमेच्या दुधी चांदव्यासारखी
चुंबनांच्या खुणा तू मिठी तू नशा
तू उरी झोंबत्या गारव्यासारखी..

जाळतो स्पर्श ओठास जेव्हा तुझा
वाटते तू मला विस्तवासारखी
चिंब ओलावले वस्त्र तू भास तू
श्रावणातील तू पावसासारखी..

झाड तू पान तू सावळी सावली
तू नितळगार चंचल नदीसारखी
पार पिंपळ विटा केशरी शांतता
तू समाधी दिवा अर्चनेसारखी..

गाय गोठ्यातली अंगणीची तुळस
तू भुकेल्या खुळ्या वासरासारखी
तू जिव्हाळ्यातही तू शहार्‍यातही
स्पंदने.. श्वास.. तू काळजासारखी....

-- संतोष वाटपाडे (नाशिक)

No comments:

Post a Comment